賣樓

 最近成功放賣收租樓。不過都有些經歷分享下。話說自己大約兩年前已經開始留意自己層收租樓個價沒有什麼升幅，加上2019 - 2020年多事之年，估計短時間內樓價向下機會比向上大，所以心大心細打算賣樓，。

咁咪去地產代理放盤先，睇下場市反應再決定。的確大半年前市場係冇乜反應，問價既人都不多。咁樣咪收住租先law, 反正自己賣唔賣層樓都係15,16，到現在都唔知自己決定是否正確。

過左三，四個月，終於有個人出價到達自己目標，須要交吉，這刻立即出現一個問題，立即簽臨約？三個月成交？四個月？因之前未有真正同租客傾過詳細安排，只係提過會有機會賣樓。於是立即打比租客，他表示要最少四個月才可以走，因為他說自己最近好忙，須要搵樓。

這答案令我非常不安，因為如果我簽了約，最後不能交吉，或遲了交吉，我會非常麻煩，有機會要支付賠償。

當時諗到唯一方法只有終止租約先，之後才簽臨約，這才安全。對買賣雙方都有保障。

當然故事結局不是這樣。地產提議一個方案，三贏方法。就係新買家用交吉形式買物業，成交後即日當新業主租比我租客，這樣對我來說，成交前我亦照常有租金。對租客來說，租客照常租用單位，不用搬屋費，再比錢agent 搵租盤。對新買家來說，雖然遲了入住該單位，但同時，新買家可以收住租金先。的確好像是完美方案。

不過這睇法只係地產代理認為好方案，最後雖然都係行這方案，但係咪係對大家都好呢？下篇再講。

期權策略的死穴

在［贏粒糖輸間廠最後都可勝出]篇文章講到當時大約有90%做期權會勝利，10%會輸。如果贏，平均每次贏$1,  如果輸，平均每次輸$3。長玩下去，必然賺錢，因為expectancy 大約有3 ((0.9x1)/(0.1x3))

經過一段時間考驗，現在大約有87%會贏，13％會輸，如果贏，平均每次贏$1,如果輸，平均每次輸$3.75。看似與前幾個月既數據差不多，但個expectancy 已經大跌到1.78 ((0.87x1)/(0.13x3.75)) 下跌了40.6%。雖然長期玩下去亦都會賺錢，但唔去搵出下跌原因及早修正，到expectancy 跌至1既時候，咁到時不如直接去賭大細，慳返D心力。

自己近排留意到，每次輸錢由$3 去到$3.75其中一個原因係不採用自願性止損，而採用情緒性止損。即係明明自己制定左unrealized loss去到expected profit的3倍，但自己冇執行，反而等到let say - $5, 自己已經太恐慌，然後情緒性止損。

其實背後令自己近排猶豫執行自願性止損係因為自己早些時間經歷左自願性止損後，第二天立即由虧轉盈。而且不止一次。

而真正死穴係，正股第二日開市gap down or gap up, 所以根本冇辦法按自己設定止損，就好像前天一開市，option已經-$12 至-$15不等, 比我原定止損-$3，多好多倍，當天我冇止損，昨天已經又回復正常，由虧轉盈。

原來自己用的策略不確定性很高，其他情況不變下，只要如果輸錢，每次輸$6.7,長玩下去，只有輸錢。而是最難控制，就係平均每次輸錢的金額。

主動與被動操作

記得自己第一次投資股票，係當時既新股中國中鐵(0390)。當時一買就升，第一個感覺係投資不是太難，亦都偏向去想，股票大部份時間都升，小部份時間跌，至少當時未曾經歷過大跌市。

之後工作太忙，就聽人講投資基金啦，新興市場什麼BRICK金磚五國既基金，於是去投資，一個2008年金融風暴，基金大跌。亦都係第一次輸錢。之後都有買股，有買輪，買債，買reits, 玩期權，但都係輸多贏少。今年三月前都係打過和。

今年三月市場大屠殺，自己都元氣大傷。當時我覺得係因為未能正確擇時進出，未能正確選擇股票，及過度leverage. 

就係知道自己未能正確擇時進出市場，同埋自問自己唔識選股，在四月開始用試用指數化ETF投資，直至現在, 相對自己主動選股，擇時進出既倉位作比較，被動式投資簡直係完勝。其實都幾 諷刺，自己既努力，又睇財報，又計機會率，又set止賺止損，又用策略，又定期review策略希望有更好回報，但都比不上合埋隻眼，不用分析只買指數化ETF來得好。

尤其是經過九月尾到現在股市的波動，及板塊輪動，指數化投資在我而言確實有可取之處。如果考慮埋時間，心力，風險等因素，指數化投資更合適我自己。

現在思考緊，是否可以用指數化ETF加期權策略，做更好回報呢？

倖存者偏差

聽到綱上有人提到一本書叫fooled by randomness。之後再上網搵一搵資料，亦有D雞精包，只須短時間就可以大約掌握書中的內容。當中提到survivorship bias，應用於投資是合適？值得諗諗。

書中提到有個年青人因為玩俄羅斯輪盤而贏得巨額金錢。因為他非常成功，所以之後他教人怎樣玩俄羅斯輪盤致富，怎樣在開槍前拍三下手或轉三圈，這樣就可以勝出，不致送命。當然用常理去諗，他應該係幸運而不是靠技術。

另一個例子係有隻猴子蒙上眼睛，擲飛標選股票，之後就跟擲中的股票去買，然後賺大錢。猴子覺得自己非常利害，於是教其他猴子擲飛標致富。

年青人同猴子覺得自己靠技術而賺大錢。外人睇，他們應該係幸運多於技術。在投資市場既參與者又係唔咁呢？自己覺得自己用技術贏錢，但原來係幸運所以贏錢？我都唔知道。巴菲特是否倖存者？他一定有技術，有知識，但這技術和知識與他買的股票上升是否有必然的关系？或是他超級幸運及超有技術，所以才有這樣的結果？類似他的價值投資者有他這樣成功數目應不多，至少我身邊沒有這些人，我身邊朋友也沒有。這是否又可以推論他們成功確是有幸運原素在其中？又或者如果自己有這些必賺技術我都唔會講比人聽。

如果有大數據，可能真的有答案。相反，眾多投資者中應該總有些玩俄羅斯輪盤的年青人和猴子參與其中。

Survivorship bias令我諗，現在做父母投放資源用於培育下一代，希望他們有好學歷，高技術，將來在金錢上冇憂。但我覺得幸運沾了大部分因素。正所謂，一命二運三風水四積陰德五讀書。古人也都認為自己努力成效，不及上天給予來得有效。這亦都係古人的統計的大數據。

心癮

美國總統大選臨近，理性話畀自己知，應該減少開倉，寧願贏少次，都不要輸多次。但個市咁波動，的確好吸引自己入市開倉。前兩天股市大升，真有一種「執輸」既感覺，因為呢幾天冇開倉，沒有賺錢（當然也沒有輸錢）。

原來控制自己唔交易係好難。雖然困難，但如果能控制自己不要因為交易而交易，也是投資技巧一部分。咁先至係投資，唔係投資控制自己。

自己主要做short option為主，做左幾年，其實都冇停過，基本上每個交易日都開倉或平倉，其實現在停一停諗一諗，自己好像吸毒一樣，一停下來就有個心癮。真係要認真面對。

現金流倉(11）

  2020.10.31

NAV: $88.43 (1.44% decrease) 

Total portfolio: $55.45

Cash: $32.35

Dividend + interest: $0.03

Realized option: $1.33

Total passive income: $1.36 (~18.39% p.a.)

今個月期權策略表現穩定，希望可以keep到。近月尾開始減少開倉，因為美國大選將近，市場波動，VIX去到差不多40。幸運地自己減少開倉，同時間亦避開了10月尾大跌所引發損失。當然，自己正股及指數ETF持倉免不了有unrealized loss. 始終，擇時進出股市係相當困難的技巧，要持續正確進出須要大量運氣。